ଦିଲ୍ଲୀରେ ଦୋସ୍ତି, ଏଠି ଚାଲିଛି କୁସ୍ତି: କଂଗ୍ରେସ-ସପାକୁ ଟାର୍ଗେଟ କରି ଏଭଳି କହିଲେ ଶିବରାଜ

ନୂଆଦିଲ୍ଲୀ: ମଧ୍ୟପ୍ରଦେଶରେ ବିଧାନସଭା ନିର୍ବାଚନ ପାଇଁ ଏବେ କଂଗ୍ରେସ ଓ ବିଜେପି ମଧ୍ୟରେ ପ୍ରତିଯୋଗିତା ଆରମ୍ଭ ହୋଇଯାଇଛି | ଏହାରି ଭିତରେ ମଧ୍ୟପ୍ରଦେଶରେ ଏବେ କଂଗ୍ରେସ ଏବଂ ସମାଜବାଦି ପାର୍ଟି ମଧ୍ୟରେ ମତଭେଦ ଆରମ୍ଭ ହୋଇଛି | ସିଟ୍ ଭାଗବଣ୍ଟାକୁ ନେଇ ଅଖିଳେଶ ଯାଦବ ଏବଂ କମଲ ନାଥଙ୍କ ମଧ୍ୟରେ ସହମତି ହୋଇପାରୁନାହିଁ। ଉଭୟ ଦଳ ଏବେ ପରସ୍ପର ବିରୋଧରେ ବିବୃତ୍ତି ଦେଉଛନ୍ତି। ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବଙ୍କ ବିବୃତ୍ତି ବିରୋଧୀ ଏକତା ଉପରେ ପ୍ରଶ୍ନ ଉଠାଇଛି। ଆଉ ଏହାକୁ ନେଇ ମଧ୍ୟପ୍ରଦେଶର ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନ ଏବେ କଟାକ୍ଷ କରିଛନ୍ତି | ସେ କହିଛନ୍ତି ଯେ ଇଣ୍ଡିଆ ଗଠବନ୍ଧନ ମଧ୍ୟରେ କୌଣସି ଦଳ ପରସ୍ପର ସପକ୍ଷରେ ନାହାନ୍ତି |ଶିବରାଜ କହିଛନ୍ତି, ‘ଯେଉଁ ଦିନ ଭାରତ ଗଠବନ୍ଧନ ଗଠନ ହୋଇଥିଲା, ସେଦିନ ମୁଁ କହିଥିଲି ଯେ ଦଳମାନଙ୍କ ମଧ୍ୟରେ ମେଳ ଖାଉ ନାହିଁ। ଏହା ଏମିତି ଏକ ଗଠବନ୍ଧନ ଯେଉଁଥିରେ ନେତାଙ୍କ ଚିନ୍ତାଧାରା ସମାନ ନାହିଁ | କେବଳ ମୋଦୀଙ୍କ ଲୋକପ୍ରିୟତାକୁ ଭୟ କରି ଏହି ମେଣ୍ଟ ଗଠନ ହୋଇଥିଲା ଯାହା ଗଠନ ହେବା ପୂର୍ବରୁ ମଧ୍ୟ ଭାଙ୍ଗି ପଡୁଛି। ଶିବରାଜ ସିଂ ଚୌହାନ କହିଛନ୍ତି ଯେ ମଧ୍ୟପ୍ରଦେଶରେ ଭାରତ ଗଠବନ୍ଧନ ରାଲିର ଯୋଜନା କରିଥିଲା। କମଲ ନାଥ ଏହାକୁ ବାତିଲ କରିଦେଲେ | ଦିଲ୍ଲୀରେ ବନ୍ଧୁତା ଏବଂ ରାଜ୍ୟରେ କୁସ୍ତି ଦେଖିବାକୁ ମିଳିଛି | ବାସ୍ତବରେ ଅଖିଳେଶ ଯାଦବ କହିଥିଲେ ଯେ କଂଗ୍ରେସ ତାଙ୍କୁ ଏବଂ ସମାଜବାଦୀ ପାର୍ଟିଙ୍କୁ ଏକ ବର୍ଷ ଧରି ଧୋକା ଦେଇଛି |