ଇଲେକ୍ଟୋରାଲ ବଣ୍ଡକୁ ନେଇ ଏସଆଇଟି ଗଠନ ପାଇଁ କଂଗ୍ରେସର ଦାବି
ନୂଆଦିଲ୍ଲୀ: ଭାରତୀୟ ଷ୍ଟେଟ ବ୍ୟାଙ୍କ ପକ୍ଷରୁ ଦିଆଯାଇଥିବା ଇଲେକ୍ଟୋରାଲ ବଣ୍ଡ ତଥ୍ୟ ନିର୍ବାଚନ ଆୟୋଗ ପ୍ରକାଶ କରିବାର ଗୋଟିଏ ଦିନ ପରେ ରାଜ୍ୟସଭା ସାଂସଦ କପିଲ ସିବଲ ଶୁକ୍ରବାର କହିଛନ୍ତି ଯେ ଏହି ମାମଲାର ତଦନ୍ତ ପାଇଁ ଅଦାଲତ ଏକ ସ୍ୱତନ୍ତ୍ର ତଦନ୍ତକାରୀ ଦଳ (ଏସଆଇଟି) ଗଠନ କରିବା ଉଚିତ।
ଶୁକ୍ରବାର ଏକ ସାମ୍ବାଦିକ ସମ୍ମିଳନୀରେ ରାଜ୍ୟସଭା ସାଂସଦ ସିବଲ କହିଛନ୍ତି ଯେ ଇଲେକ୍ଟୋରାଲ ବଣ୍ଡ ପ୍ରସଙ୍ଗର କୌଣସି ତଦନ୍ତକାରୀ ଏଜେନ୍ସି ଦ୍ୱାରା ତଦନ୍ତ କରାଯିବ ନାହିଁ। ଇଡି ଓ ସିବିଆଇ ଏବେ ଶୋଇଛନ୍ତି। ଯଦି ବିରୋଧୀଙ୍କ ବିରୋଧରେ ଏଭଳି ଘଟଣା ଘଟେ ତେବେ ସେମାନେ କାର୍ଯ୍ୟାନୁଷ୍ଠାନ ଗ୍ରହଣ କରିଥାନ୍ତେ। ସେମାନେ ନିଦ ବଟିକାର ଅତ୍ୟଧିକ ମାତ୍ରା ନେଇଛନ୍ତି। ମନେ ଥିବ କାରଣ ମୁଁ ନୁହେଁ, କେହି ଜଣେ (ପ୍ରଧାନମନ୍ତ୍ରୀ ମୋଦୀଙ୍କ ଉଦ୍ଦେଶ୍ୟରେ) ‘ନା ଖାଉଙ୍ଗା ନା ଖାନେ ଦୁୁଙ୍ଗା’ କହିଥିଲେ। ତାହାର କ’ଣ ହେଲା? କେହି ଜଣେ (ପ୍ରଧାନମନ୍ତ୍ରୀ ମୋଦୀ) କହିଥିଲେ ଯେ ସେମାନେ ସୁଇସ୍ ବ୍ୟାଙ୍କରୁ କଳାଧନ ଆଣି ଲୋକଙ୍କ ଆକାଉଣ୍ଟକୁ ୧୫ ଲକ୍ଷ ଟଙ୍କା ଟ୍ରାନ୍ସଫର କରିବେ, କିନ୍ତୁ ଲାଗୁଛି ସେମାନେ ସେହି ଟଙ୍କାକୁ ସେମାନଙ୍କ ଆକାଉଣ୍ଟକୁ ଟ୍ରାନ୍ସଫର କରିଛନ୍ତି। ମୋ ମତରେ ଏହାର କୌଣସି ତଦନ୍ତକାରୀ ସଂସ୍ଥା ତଦନ୍ତ କରିବ ନାହିଁ। ଏବେ ସେମାନେ କ’ଣ କରିବେ ଓ କ’ଣ ପଦକ୍ଷେପ ନେବେ ତାହା ନିର୍ଦ୍ଧାରଣ କରିବାର ଦାୟିତ୍ୱ ସୁପ୍ରିମ୍ କୋର୍ଟଙ୍କ ଉପରେ ରହିଛି ବୋଲି ସିବଲ କହିଛନ୍ତି।
ସେ ଆହୁରି ମଧ୍ୟ କହିଛନ୍ତି ଯେ ଦେଶରେ ଯେଉଁ ଦୁଇଟି ବଡ଼ ଦୁର୍ନୀତି ଘଟିଛି, ତାହା ହେଉଛି ବିମୁଦ୍ରାକରଣ ଏବଂ ଅନ୍ୟ ଏକ ଦୁର୍ନୀତି ହେଉଛି ଇଲେକ୍ଟୋରାଲ ବଣ୍ଡ।
୨-ଜି ମାମଲାରେ ଯେଉଁଭଳି ଭାବେ ଏସ୍ଆଇଟି ଗଠନ ହୋଇଥିଲା, ସେହିଭଳି ଏହି ମାମଲାରେ ମଧ୍ୟ ଏସ୍ଆଇଟି ଗଠନ କରାଯାଇ ଘଟଣାର ତଦନ୍ତ କରାଯାଉ। ଏବେ ଆଇନ ଏହାକୁ କେମିତି ଦେଖିବ ତାହା ଦେଖିବାକୁ ପଡ଼ିବ। ପିଏମ୍ କେୟାର୍ସକୁ କିଏ ଦାନ କରିଛି ତାହା ମଧ୍ୟ ଜାଣିବା ଦରକାର। କେଉଁ ଦଳ କେତେ ପାଣ୍ଠି ପାଇଲା ତାହା ତଦନ୍ତର ବିଷୟ ବୋଲି ସେ କହିଛନ୍ତି।