ଆଜି ସରସ୍ବତୀ ପୂଜା: ଶିକ୍ଷାନୁଷ୍ଠାନରେ ଚାଲିଛି ମା ବାଗଦେବୀଙ୍କ ଆରାଧନା

ଭୁବନେଶ୍ବର: ଆଜି ସରସ୍ବତୀ ପୂଜା। ଏହି କାରଣରୁ ଶିକ୍ଷାନୁଷ୍ଠାନଗୁଡ଼ିକ ଉତ୍ସବମୁଖର ହୋଇଥିବାର ପରିଲକ୍ଷିତ ହୋଇଛି। ସକାଳୁ ସକାଳୁ ସ୍କୁଲ ଓ କଲେଜର ଛାତ୍ରଛାତ୍ରୀମାନେ ନିଜ ନିଜ ଶିକ୍ଷାନୁଷ୍ଠାନରେ ପହଞ୍ଚିଥିବା ଜଣାଯାଇଛି। ଗତକାଲିଠାରୁ ସରସ୍ବତୀ ପୂଜା ପାଇଁ ଶିକ୍ଷାନୁଷ୍ଠାନଗୁଡ଼ିକୁ ସଜାଯାଇଛି। ଛାତ୍ରଛାତ୍ରୀ ଓ ଶିକ୍ଷକ ଶିକ୍ଷୟିତ୍ରୀମାନଙ୍କର ଉତ୍ସାହ ବହୁଗୁଣିତ ହୋଇଥିବା ପରିଲକ୍ଷିତ ହୋଇଛି। ଏହାଛଡ଼ା ଉଦଳାଠାରେ ଥିବା ମା’ ବାଗଦେବୀଙ୍କ ମନ୍ଦିରରେ ବି ବିଶେଷ ପୂଜାର୍ଚ୍ଚନା ଚାଲିଛି। ଏଠାରେ ନିଜର ପିଲାମାନଙ୍କୁ ଖଡ଼ି ଛୁଆଁଇବା ଲାଗି ବାପାମାଆମାନେ ପହଞ୍ଚୁଛନ୍ତି।ସୂଚନାଯୋଗ୍ୟ, ଚଳିତ ବର୍ଷ  ଶ୍ରୀମନ୍ଦିରରେ କେଉଁ ତାରିଖରେ ସରସ୍ବତୀ ପୂଜା ଅନୁଷ୍ଠିତ ହେବ ସେନେଇ ଦ୍ବନ୍ଦ୍ବ ଉପୁଜିଥିଲା। ହେଲେ ଅବଶେଷରେ ଫେବ୍ରୁଆରି ୨ ତାରିଖରେ ଶ୍ରୀପଞ୍ଚମୀ ନୀତି ଓ ସରସ୍ବତୀ ପୂଜା ଅନୁଷ୍ଠିତ ହେବ ବୋଲି ଜଣାଯାଇଥିଲା। ଏ ନେଇ ନୀତିକାନ୍ତି ଚୂଡ଼ାନ୍ତ କରିଥିଲା ଶ୍ରୀମନ୍ଦିର ପ୍ରଶାସନ। ଶ୍ରୀମନ୍ଦିର ନୀତି ପ୍ରଶାସକ ଜିତେନ୍ଦ୍ର କୁମାର ସାହୁ କହିଥିଲେ, ଶ୍ରୀମନ୍ଦିର କ୍ୟାଲେଣ୍ଡର୍ରେ ଫେବ୍ରୁଆରି ୨ ତାରିଖରେ ସରସ୍ବତୀ ପୂଜା ପଡ଼ୁଛି। ସେହି ଅନୁସାରେ ଶ୍ରୀମନ୍ଦିରରେ ଫେବ୍ରୁଆରି ୨ ତାରିଖରେ ସରସ୍ବତୀ ପୂଜା ପାଳନ ହେବ ଓ ରଥକାଠ ଅନୁକୂଳ ହେବ।