କଣାସରେ କିମ୍ସ ପକ୍ଷରୁ ବିଶାଳ ସ୍ବାସ୍ଥ୍ୟ ଶିବିର ଆୟୋଜିତ, ସ୍ବାସ୍ଥ୍ୟ ପରୀକ୍ଷା ସହ ମାଗଣାରେ ଔଷଧ ବଣ୍ଟନ
ପିପିଲି : ପୁରୀ ଜିଲ୍ଲା କଣାସ ବ୍ଲକ ଦୋକନ୍ଦା ହାଇସ୍କୁଲ ପରିସରରେ କିମ୍ସ ପକ୍ଷରୁ ଏକ ବିଶାଳ ମାଗଣା ସ୍ୱାସ୍ଥ୍ୟ ଶିବିର ଆୟୋଜିତ । ଏହାକୁ ଉଦଘାଟନ କରିଥିଲେ କିଟ୍ ଓ କିସ ପ୍ରତିଷ୍ଠାତା ଡକ୍ଟର ଅଚ୍ୟୁତ ସାମନ୍ତ । ଏଥିରେ ୫ହଜାରରୁ ଉର୍ଦ୍ଧ୍ୱ ଲୋକ ସ୍ୱାସ୍ଥ୍ୟ ପରୀକ୍ଷା କରାଇବା ସହ ମାଗଣାରେ ଔଷଧ ନେଇଥିଲେ । ଗରିବ, ବୟସ୍କ ଏବଂ ଅସହାୟଙ୍କୁ କିମ୍ସ ପକ୍ଷରୁ ମାଗଣା ସ୍ୱାସ୍ଥ୍ୟ ସେବା ଯୋଗାଇ ଦିଆଯାଇଛି । କଣାସରେ ଗତ ମାସରେ ଝାଡ଼ାବାନ୍ତିରେ ଲୋକଙ୍କ ମୃତ୍ୟୁ ହେବା ସହ ଅନେକ ଆକ୍ରାନ୍ତ ହୋଇଥିଲେ । ତେଣୁ ସ୍ୱାସ୍ଥ୍ୟ ସେବା ପାଇଁ ଏହି କ୍ୟାମ୍ପ ନିଶ୍ଚିତ ଭାବରେ ଏକ ବରଦାନ ସାବ୍ୟସ୍ତ ହେବ । ଶିଶୁ ମାନଙ୍କ ଠାରୁ ଆରମ୍ଭ କରି ବୟସ୍କଙ୍କ ପର୍ଯ୍ୟନ୍ତ ସମସ୍ତେ ସାମିଲ ହୋଇଥିଲେ ।ଶିବିରରେ ବିଭିନ୍ନ ବିଭାଗର ଅଭିଜ୍ଞ ଡାକ୍ତରମାନେ ଯୋଗଦେଇ ଲୋକଙ୍କ ସ୍ବାସ୍ଥ୍ୟ ପରୀକ୍ଷା କରିଥିଲେ । ପରେ ବିନା ମୂଲ୍ୟରେ ଔଷଧ ବଣ୍ଟନ କରିଥିଲେ। ଡକ୍ଟର ଅଚ୍ୟୁତ ସାମନ୍ତଙ୍କ ଏଭଳି କାର୍ଯ୍ୟକ୍ରମକୁ ପ୍ରଶଂସା କରିଛନ୍ତି ସ୍ଥାନୀୟ ଲୋକ । ଗ୍ରାମୀଣ ପରିବେଶରେ ଏଭଳି କାର୍ଯ୍ୟକ୍ରମ କରିବା ଦ୍ବାରା ରୋଗୀ ମାନେ ଉନ୍ନତ ସେବା ପାଇଛନ୍ତି । ଏଥିପାଇଁ କିଟ୍ ଓ କିସ୍ ପ୍ରତିଷ୍ଠାତା ଡକ୍ଟର ସାମନ୍ତଙ୍କୁ ଧନ୍ୟବାଦ ଜଣାଇଛନ୍ତି ।