ଆମେରିକାରେ ଥିବା ଛାତ୍ରଛାତ୍ରୀଙ୍କୁ ଭାରତର ପରାମର୍ଶ: ଆମେରିକୀୟ ଆଇନ ପାଳନ କରିବାକୁ ପଡ଼ିବ
ନୂଆଦିଲ୍ଲୀ: ଜଣେ ଗବେଷକ ଗିରଫ ହେବା ଏବଂ ଅନ୍ୟ ଜଣେ ଛାତ୍ରଙ୍କୁ କାନାଡାକୁ ସ୍ବ-ପ୍ରତ୍ୟର୍ପିତ କରିବାକୁ ପଡ଼ିବା ପରେ ଭାରତ ସରକାର ଆମେରିକାରେ ପଢୁଥିବା ନିଜ ନାଗରିକମାନଙ୍କୁ ଆମେରିକୀୟ ଆଇନ ପାଳନ କରିବାକୁ ପରାମର୍ଶ ଦେଇଛନ୍ତି। ଜର୍ଜଟାଉନ ବିଶ୍ୱବିଦ୍ୟାଳୟର ପୋଷ୍ଟଡକ୍ଟରାଲ ଫେଲୋ ବଦର୍ ଖାନ୍ ସୁରିଙ୍କ ବିରୋଧରେ ଆମେରିକା କର୍ତ୍ତୃପକ୍ଷ ହମାସର ପ୍ରଚାର ପ୍ରସାର କରିବା ନେଇ ଅଭିଯୋଗ ଆଣିଥିବା ବେଳେ କଲମ୍ବିଆ ବିଶ୍ୱବିଦ୍ୟାଳୟର ଛାତ୍ର ରଞ୍ଜିନୀ ଶ୍ରୀନିବାସନ ପାଲେଷ୍ଟାଇନ ସମର୍ଥକ ଆନ୍ଦୋଳନରେ ଅଂଶଗ୍ରହଣ କରିଥିବାରୁ ତାଙ୍କ ଭିସା ରଦ୍ଦ କରାଯାଇଛି। ଦୁଇ ଭାରତୀୟ ସହାୟତା ପାଇଁ ଆମେରିକାରେ ଥିବା ଭାରତୀୟ ଦୂତାବାସ ସହ ଯୋଗାଯୋଗ କରି ନଥିଲେ ବୋଲି ବୈଦେଶିକ ବ୍ୟାପାର ମନ୍ତ୍ରାଳୟର ମୁଖପାତ୍ର ରଣଧୀର ଜୟସ୍ୱାଲ କହିଛନ୍ତି।
ପାଲେଷ୍ଟାଇନ ସମର୍ଥକ କ୍ୟାମ୍ପସ ବିକ୍ଷୋଭ ଉପରେ ଆମେରିକାର କାର୍ଯ୍ୟାନୁଷ୍ଠାନର ଶିକାର ହୋଇଛନ୍ତି ସୁରି ଓ ଶ୍ରୀନିବାସନ। ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏଭଳି ବ୍ୟକ୍ତିମାନଙ୍କୁ ‘ଆତଙ୍କବାଦୀ ସମର୍ଥକ’ ବୋଲି ଅଭିହିତ କରି ଦେଶାନ୍ତର କରିବାକୁ ଧମକ ଦେଇଛନ୍ତି। ଟ୍ରମ୍ପଙ୍କ ଏହି ନୀତି ଶିକ୍ଷା ଜଗତକୁ ଦୋହଲାଇ ଦେଇଛି ଏବଂ ଛାତ୍ରଛାତ୍ରୀମାନେ ଏବେ ସେମାନଙ୍କ ରହଣି ଅନୁମତି ହରାଇବା ଭୟ କରୁଛନ୍ତି। ତାଙ୍କ ପତ୍ନୀ ପାଲେଷ୍ଟାଇନ୍ ନାଗରିକ ହେବା କାରଣରୁ ତାଙ୍କୁ ଗିରଫ କରାଯାଇଥିବା ଦାବି କରୁଥିବା ସୁରିଙ୍କୁ ଆମେରିକା କର୍ତ୍ତୃପକ୍ଷ ପ୍ରତ୍ୟର୍ପଣ କରିବାକୁ ଜିଦ୍ ଧରିଥିଲେ ମଧ୍ୟ ନିକଟରେ ଏକ ଅଦାଲତ ତାଙ୍କୁ ଦେଶରୁ ହଟାଇବା ଉପରେ ରୋକ୍ ଲଗାଇଛନ୍ତି। ଅନ୍ୟପକ୍ଷରେ ଶ୍ରୀନିବାସନଙ୍କ ଆମେରିକା ଭିସା ରଦ୍ଦ ହେବା ପରେ ସେ କାନାଡା ଚାଲିଯାଇଥିଲେ। କଲମ୍ବିଆ ବିଶ୍ୱବିଦ୍ୟାଳୟର ଡକ୍ଟରେଟ୍ ଛାତ୍ର ମାର୍ଚ୍ଚ ୧୧ରେ କାନାଡାକୁ ସ୍ୱ-ପ୍ରତ୍ୟର୍ପିତ କରିବା ପାଇଁ ସୀମା ଶୁଳ୍କ ଓ ସୀମା ସୁରକ୍ଷା ହୋମ୍ ଆପ୍ ବ୍ୟବହାର କରିଥିଲେ।
ବିଦେଶ ମନ୍ତ୍ରାଳୟ ମୁଖପାତ୍ର କହିଛନ୍ତି, ଆମେ ଆଶା କରୁଛୁ ଯେ ଯେତେବେଳେ ବିଦେଶୀ ନାଗରିକମାନେ ଭାରତ ଆସୁଛନ୍ତି, ସେମାନେ ଆମର ଆଇନ ଓ ନିୟମ ପାଳନ କରିବେ। ସେହିଭଳି ଯେତେବେଳେ ଭାରତୀୟ ନାଗରିକମାନେ ବିଦେଶରେ ଥାଆନ୍ତି, ସେମାନେ ମଧ୍ୟ ସ୍ଥାନୀୟ ଆଇନ ଓ ନିୟମ ପାଳନ କରିବା ଆବଶ୍ୟକ। ସାମ୍ବାଦିକ ସମ୍ମିଳନୀରେ ସେ ଛାତ୍ରଛାତ୍ରୀମାନଙ୍କୁ ଆଶ୍ୱାସନା ଦେଇ କହିଛନ୍ତି ଯେ ଯଦି ସେମାନେ କୌଣସି ଅସୁବିଧାର ସମ୍ମୁଖୀନ ହୁଅନ୍ତି ତେବେ ଆମେରିକାରେ ଥିବା ଭାରତୀୟ ଦୂତାବାସ ସେମାନଙ୍କୁ ସାହାଯ୍ୟ କରିବ।