ବର୍ଷା ହେବନି ବାଧକ ପିଚକୁ ସୁରକ୍ଷା ଦେବ ‘ହୋଭର କଭର’

କଟକ : ବାରବାଟୀ ଷ୍ଟାଡିୟମ ସ୍ୟାଣ୍ଡ ବେସ୍‍ ଗ୍ରାଉଣ୍ଡରେ ପରିଣତ ହୋଇଛି ଅର୍ଥାତ୍‍ ବର୍ଷାଜଳ ତୁରନ୍ତ ଶୋଷିନେବ ମାଟି ଫଳରେ ମ୍ୟାଚ୍‍ ଆୟୋଜନରେ କୌଣସି ବାଧା ହେବ ନାହିଁ। ତେବେ ଏହି ବ୍ୟବସ୍ଥା ଭିତରେ ପୁଣି ଏକ ନୂଆ ଯୋଜନା ଓଡ଼ିଶା କ୍ରିକେଟ ଆସୋସିଏସନ(ଓସିଏ) ସଂଯୋଗ କରିଛି ‘ହୋଭର କଭର’। ବିଦେଶରେ କ୍ରିକେଟ ଷ୍ଟାଡିୟମରେ ‘ହୋଭର କଭର’ ବ୍ୟବହାର ହୁଏ। ଯାହା ବାରବାଟୀରେ ଦେଖିବାକୁ ମିଳିବ। ବର୍ଷାହେଲେ ଏଣିକି ଜରିପାଲ ଖୋଜିବାକୁ ପଡ଼ିବନି। ଏହି କଭରର ମୂଲ୍ୟ ୧ କୋଟି ଟଙ୍କା ହୋଇଥିବା ବେଳେ ଇଂଲଣ୍ଡରୁ ଏହା ଅର୍ଡର ଦିଆଯାଇଛି ବୋଲି ଜଣାପଡ଼ିଛି।ଏହି ‘ହୋଭର କଭର’ ଆସନ୍ତା ଜୁନ୍ ୧୦ ତାରିଖ ସୁଦ୍ଧା କଟକରେ ପହଞ୍ଚିବାର ଯୋଜନା ଅଛି ।ଏହି କଭର ସୂକ୍ଷ୍ମ ଫାଇବରର । ଇଲଣ୍ଡର ଏକ କମ୍ପାନୀ ଠାରୁ ଓସିଏ ଏହାକୁ ଏକ କୋଟି କିଣିଛି ।   କଟକ ମ୍ୟାଚ୍ ବେଳକୁ ଓଡିଶାରେ ମୌସୁମୀ ସକ୍ରିୟ ହୋଇସାରିଥିବ ବୋଲି ପାଣିପାଗ ବିଭାଗର ପୂର୍ବାନୁମାନରୁ ଜଣାପଡିଛି । ଜୁନ୍ ପ୍ରଥମ ସପ୍ତାହ ସୁଦ୍ଧା ମୌସୁମୀ ଓଡିଶାରେ ପହଞ୍ଚି ସାରିଥିବ । ତେଣୁ ଜୁନ୍ ୧୨ରେ ହେବାକୁ ଥିବା ବାରବାଟୀ ଟି-୨୦ ମ୍ୟାଚ ପାଇଁ ପୂରା ପ୍ରସ୍ତୁତ ରହିଛି ଆୟୋଜକ ଓସିଏ । ବର୍ଷା ହେଲେ ବି ମ୍ୟାଚରେ ବିଶେଷ ପ୍ରଭାବ ପଡିବ ନାହିଁ ବୋଲି କୁହାଯାଇଛି । କାରଣ ଏଥର ‘ସ୍ୟାଣ୍ଡ ବେସ୍ ଫିଲ୍ଡ’ ବା ବାଲି ଭିତ୍ତିଭୂମି ଉପରେ ନିର୍ମିତ ପଡିଆରେ ଖେଳାଯିବ ମ୍ୟାଚ୍ । ଅନ୍ୟପଟେ ସମଗ୍ର ଦେଶରେ କୋଭିଡ ସଂକ୍ରମଣ କମିଯିବା ପରେ ଭାରତ-ଦକ୍ଷିଣ ଆଫ୍ରିକା ଟି-୨୦ ସିରିଜ୍‍ରେ ଶତପ୍ରତିଶତ ଦର୍ଶକ ଷ୍ଟାଡିୟମ୍‍ରେ ଖେଳ ଦେଖିବାକୁ ବିସିସିଆଇର ଅନୁମତି ଦେଇଛି। ଏହା ସତ୍ତ୍ବେ ବାରବାଟୀରେ ଶତ ପ୍ରତିଶତ ଦର୍ଶକ ଉପସ୍ଥିତି ରହି ପାରିବେ କି ନାହିଁ ତାହା ଓଡ଼ିଶା କ୍ରିକେଟ ଆସୋସିଏସନ(ଓସିଏ) ଘୋଷଣା କରିନାହିଁ। ଓସିଏ ସମ୍ପାଦକ ସଞ୍ଜୟ ବେହେରା କହିଛନ୍ତି ଯେ, ବିସିସିଆଇର ଘୋଷଣା ପରେ ଆମେ ରାଜ୍ୟ ସରକାରଙ୍କ ଅନୁମତିକୁ ଅପେକ୍ଷା କରିଛୁ। ପୂର୍ବରୁ ଶତ ପ୍ରତିଶତ ଦର୍ଶକ ଉପସ୍ଥିତି ନିମନ୍ତେ ଅନୁମତି ଦେବାକୁ ରାଜ୍ୟ ସରକାରଙ୍କୁ ଚିଠି ଲେଖାଯାଇଥିଲା। ଏହାକୁ ନେଇ ଆଜି ଏକ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହେବ। ରାଜ୍ୟ ସରକାରଙ୍କ ପ୍ରତିନିଧି ଏଥିରେ ଯୋଗ ଦେବେ। ସମ୍ଭବତଃ ଉକ୍ତ ପ୍ରସଙ୍ଗରେ ଚୂଡ଼ାନ୍ତ ଘୋଷଣା କରାଯିବ ବୋଲି ସେ କହିଛନ୍ତି।ସୂଚନାଯୋଗ୍ୟ, ବାରବାଟୀ ଷ୍ଟାଡିୟମରେ ୪୪ହଜାର ଦର୍ଶକ ବସିବା ଭଳି କ୍ଷମତା ରହିଛି। ମ୍ୟାଚ୍‍ ଦିନ ପାଖେଇ ଆସୁଥିବା ବେଳେ ଓସିଏ ପାଇଁ ଏକ ନୂଆ ସମସ୍ୟା ମଧ୍ୟ ସାମ୍ନାକୁ ଆସିଛି। ଷ୍ଟାଡିୟମର ଅଗ୍ନି ସୁରକ୍ଷା ପ୍ରମାଣପତ୍ର ନାହିଁ। ଏଣୁ ଯଦି କୌଣସି ଅଘଟଣ ଘଟେ ତାହେଲେ ଅନେଜ ଜୀବନହାନି ହେବାର ସମ୍ଭାବନା ରହିଛି। ଏହାକୁ ନେଇ ରାଜ୍ୟ ମାନବାଧିକାର କମିଶନ(ଓଏଚ୍‍ଆରସି)ଙ୍କ ନିକଟରେ ପିଟିସନ୍‍ ମଧ୍ୟ ଦାଖଲ ହୋଇଛି। କମିଶନ ଏହାର ଶୁଣାଣି କରି ଓସିଏ ସମ୍ପାଦକ ସଞ୍ଜୟ ଓ ଡିସିପି ପିନାକ ମିଶ୍ରଙ୍କୁ ଜବାବ ତଲବ କରିଛନ୍ତି। ଆସନ୍ତା ୨୬ ସୁଦ୍ଧା ଅଗ୍ନି ନିରାପତ୍ତା ବ୍ୟବସ୍ଥା କରି ରିପୋର୍ଟ ଦାଖଲ କରିବାକୁ କମିଶନ ପକ୍ଷରୁ କୁହାଯାଇଛି।