ରାଜଧାନୀରେ ଗନ୍ ମାଫିଆ ସକ୍ରିୟ, ଏତେ ସହଜରେ ମିଳୁଛି କେମିତି?

ଭୁବନେଶ୍ୱର: ରାଜଧାନୀ ଭୁବନେଶ୍ୱରରେ ବେଆଇନ ବନ୍ଧୁକକୁ ନେଇ ବଢ଼ୁଛି ଚିନ୍ତା । ଅପରାଧୀଙ୍କ ହାତରେ କେମିତି ପହଞ୍ଚୁଛି ମାରଣାସ୍ତ୍ର? ବନ୍ଧୁକ ଯୋଗାଣ ପଛରେ କାମ କରୁଛି କି ସଂଗଠିତ ଅପରାଧୀ ନେଟୱର୍କ? ରାଜ୍ୟ ବାହାରୁ ଆସୁଛି ନା ରାଜ୍ୟ ଭିତରେ ଚାଲିଛି ବେଆଇନ ଅସ୍ତ୍ର କାରବାର? ଏଭଳି ଏକାଧିକ ପ୍ରଶ୍ନ ଏବେ ରାଜଧାନୀର ସୁରକ୍ଷା ବ୍ୟବସ୍ଥାକୁ ନେଇ ଉଠିଛି । ଭୁବନେଶ୍ୱର ଭଳି ଏକ ଦ୍ରୁତ ବିକାଶଶୀଳ ସହରରେ ବେଆଇନ ଅସ୍ତ୍ରର ଉପଲବ୍ଧତା ଏକ ଗମ୍ଭୀର ଆଇନଶୃଙ୍ଖଳା ସମସ୍ୟା । ଅପରାଧୀଙ୍କ ପାଖରେ ବନ୍ଧୁକ ପହଞ୍ଚିଲେ ସାମାନ୍ୟ ବିବାଦ ମଧ୍ୟ ଭୟଙ୍କର ହିଂସାର ରୂପ ନେଇପାରେ । ଧମକଚମକ, ଦାଦାବଟି ଆଦାୟ, ବ୍ୟକ୍ତିଗତ ଶତ୍ରୁତା ଓ ଗ୍ୟାଙ୍ଗ୍ ବିବାଦରେ ଏଭଳି ଅସ୍ତ୍ର ବ୍ୟବହାର ହେବାର ଆଶଙ୍କା ରହିଛି ।

ସବୁଠୁ ବଡ଼ ପ୍ରଶ୍ନ ହେଉଛି, ବନ୍ଧୁକ ଆସୁଛି କେଉଁଠୁ? ଦେଶର ବିଭିନ୍ନ ସ୍ଥାନରେ ବେଆଇନ ଅସ୍ତ୍ର ଯୋଗାଣ ପଛରେ ଚୋରାଚାଲାଣକାରୀ, ମଧ୍ୟସ୍ଥି ଓ ସଂଗଠିତ ଅପରାଧୀ ଗୋଷ୍ଠୀଙ୍କ ସମ୍ପୃକ୍ତି ଦେଖିବାକୁ ମିଳିଥାଏ । ତେବେ ଭୁବନେଶ୍ୱରକୁ ଅସ୍ତ୍ର ଯୋଗାଣର ପ୍ରକୃତ ଉତ୍ସ ଓ ନେଟୱର୍କ ସମ୍ପର୍କରେ ନିର୍ଦ୍ଦିଷ୍ଟ ତଦନ୍ତ ତଥ୍ୟ ଆବଶ୍ୟକ । କେବଳ ବନ୍ଧୁକ ଧରିଥିବା ଅପରାଧୀଙ୍କୁ ଗିରଫ କରିଦେଲେ ସମସ୍ୟାର ସମାଧାନ ହେବ ନାହିଁ । ଅସ୍ତ୍ର କିଏ ତିଆରି କରୁଛି, କିଏ ଯୋଗାଉଛି, କିଏ କିଣୁଛି ଓ ଏହି କାରବାର ପାଇଁ ଟଙ୍କା କେଉଁଠୁ ଆସୁଛି, ତାହାର ମୂଳ ପର୍ଯ୍ୟନ୍ତ ପହଞ୍ଚିବା ଜରୁରୀ । ଜବତ ଅସ୍ତ୍ରର ଫରେନସିକ୍ ପରୀକ୍ଷା, ପୂର୍ବ ଅପରାଧ ସହ ସମ୍ପର୍କ ଏବଂ ଅସ୍ତ୍ର ଯୋଗାଣକାରୀଙ୍କ ଚିହ୍ନଟ ତଦନ୍ତରେ ଗୁରୁତ୍ୱପୂର୍ଣ୍ଣ। ଏଠାରେ କମିଶନରେଟ୍ ପୋଲିସର ଭୂମିକା ମଧ୍ୟ ଗୁରୁତ୍ୱପୂର୍ଣ୍ଣ । ବେଆଇନ ଅସ୍ତ୍ର ରଖୁଥିବା ଅପରାଧୀଙ୍କ ଉପରେ ନଜର ରଖିବା ସହ ଅସ୍ତ୍ର ଯୋଗାଣ ଶୃଙ୍ଖଳାକୁ ଭାଙ୍ଗିବା ଆବଶ୍ୟକ ।

ଗୁଇନ୍ଦା ସୂଚନା ସଂଗ୍ରହ, ଅନ୍ତଃରାଜ୍ୟ ପୋଲିସ ସମନ୍ୱୟ ଓ ପେସାଦାର ଅପରାଧୀଙ୍କ ଉପରେ କଡ଼ା ନଜର ଏ କ୍ଷେତ୍ରରେ ଫଳପ୍ରଦ ହୋଇପାରେ। ଏଠାରେ ପ୍ରଶ୍ନ ଉଠୁଛି, ରାଜଧାନୀରେ ବେଆଇନ ବନ୍ଧୁକ କାରବାରକୁ ରୋକିବା ପାଇଁ କେତେ ସକ୍ଷମ ରହିଛି ପୋଲିସର ଗୁଇନ୍ଦା ବ୍ୟବସ୍ଥା? ଜବତ ହେଉଥିବା ଅସ୍ତ୍ରର ଯୋଗାଣକାରୀଙ୍କ ପାଖରେ ପହଞ୍ଚିପାରୁଛି କି ତଦନ୍ତ? ନା କେବଳ ଅସ୍ତ୍ର ରଖିଥିବା ବ୍ୟକ୍ତିଙ୍କ ଗିରଫଦାରୀରେ ସୀମିତ ରହିଯାଉଛି କାର୍ଯ୍ୟାନୁଷ୍ଠାନ? ରାଜଧାନୀର ସୁରକ୍ଷା ପାଇଁ କେବଳ ଅପରାଧ ଘଟିବା ପରେ କାର୍ଯ୍ୟାନୁଷ୍ଠାନ ନୁହେଁ, ବରଂ ଅପରାଧ ପୂର୍ବରୁ ବେଆଇନ ଅସ୍ତ୍ରର ଯୋଗାଣ ବନ୍ଦ କରିବା ହେଉଛି ସବୁଠାରୁ ବଡ଼ ଆହ୍ୱାନ । ରାଜଧାନୀରେ ବେଆଇନ ବନ୍ଧୁକ କାରବାର କେବଳ ଆଶଙ୍କା ନୁହେଁ ।

ପୋଲିସର ବିଭିନ୍ନ ଚଢ଼ାଉରୁ ଏହାର ପ୍ରମାଣ ମିଳିଛି ଜୁଲାଇ ୨୦୨୪–ଜୁନ୍ ୨୦୨୬ ମଧ୍ୟରେ ୨ ହଜାର ୬୭୪ ବେଆଇନ ଅସ୍ତ୍ର ସମ୍ପର୍କିତ ମାମଲା ରୁଜୁ ହେବା ସହ ରାଜ୍ୟବ୍ୟାପୀ ସ୍ୱତନ୍ତ୍ର ଅଭିଯାନରେ ୩ ହଜାର ୩୮୮ ବ୍ୟକ୍ତି ଗିରଫ ହୋଇଛନ୍ତି । ୨୦୨୫ ସେପ୍ଟେମ୍ବରରେ କମିଶନରେଟ୍ ପୋଲିସର ସ୍ପେଶାଲ କ୍ରାଇମ୍ ୟୁନିଟ୍ ଏକ ଅନ୍ତଃରାଜ୍ୟ ଅସ୍ତ୍ର ଚୋରାଚାଲାଣ ରାକେଟ୍ ର ପର୍ଦ୍ଦାଫାସ କରିଥିଲା । ତିନିଜଣଙ୍କୁ ଗିରଫ କରାଯିବା ସହ ୮ଟି ସେମି-ଅଟୋମେଟିକ୍ ପିସ୍ତଲ ଓ ୩୪ ରାଉଣ୍ଡ ଗୁଳି ଜବତ ହୋଇଥିଲା। ତଦନ୍ତରେ ବିହାର, ଝାଡ଼ଖଣ୍ଡ ଓ ସ୍ଥାନୀୟ ବିତରକଙ୍କ ସମ୍ପର୍କ ସାମ୍ନାକୁ ଆସିଥିଲା ।

ଡିସେମ୍ବର ୨୦୨୫ରେ ଖଣ୍ଡଗିରି ନିକଟରେ ଆଉ ଏକ ଅସ୍ତ୍ର ଚୋରାଚାଲାଣ ରାକେଟ୍ ଧରାପଡ଼ିଥିଲା । ଦୁଇ ଅଭିଯୁକ୍ତଙ୍କଠାରୁ ୧୧ଟି ବନ୍ଧୁକ ଜବତ ହୋଇଥିଲା । ତଦନ୍ତରେ ଝାଡ଼ଖଣ୍ଡ ଓ ବିହାରର ମୁଙ୍ଗେର ସହ ଅସ୍ତ୍ର ଯୋଗାଣର ସମ୍ପର୍କ ଥିବା ସୂଚନା ମିଳିଥିଲା। ଗତ ଜାନୁଆରୀରେ ଚନ୍ଦକା ଥାନା ଅଞ୍ଚଳରୁ ୬ଟି ସେମି-ଅଟୋମେଟିକ୍ ପିସ୍ତଲ ଓ ୧୦ ରାଉଣ୍ଡ ଗୁଳି ଜବତ ହୋଇଥିଲା । ଏପ୍ରିଲରେ ସୁନ୍ଦରପଦା ଅଞ୍ଚଳରୁ ମଧ୍ୟ ଦୁଇଟି ପିସ୍ତଲ ଜବତ କରିଥିଲା ପୋଲିସ । ଏସବୁ ଘଟଣା ରାଜଧାନୀରେ ବେଆଇନ ଅସ୍ତ୍ର ଯୋଗାଣର ବିପଦକୁ ସ୍ପଷ୍ଟ କରୁଛି। ତେବେ ବନ୍ଧୁକ ଜବତ ବଢ଼ିବା ଅର୍ଥ ଗୁଳିକାଣ୍ଡ ସଂଖ୍ୟା ବଢ଼ିଛି ବୋଲି ନୁହେଁ। ଏଥିପାଇଁ ବର୍ଷୱାରୀ ଅପରାଧ ତଥ୍ୟ ଆବଶ୍ୟକ ରହିଛି ।