ଆମେରିକା-ଇରାନ ଶାନ୍ତି ଆଲୋଚନା ପୂର୍ବରୁ ସ୍ଥାଣୁ ହେଲା ଜନଜୀବନ, ସଙ୍କଟରେ ପାକିସ୍ତାନ ଅର୍ଥନୀତି

ଆମେରିକା ଓ ଇରାନ ମଧ୍ୟରେ ସମ୍ଭାବ୍ୟ ଶାନ୍ତି ଆଲୋଚନା ପାଇଁ ପାକିସ୍ତାନର ରାଜଧାନୀ ଇସଲାମାବାଦ ବର୍ତ୍ତମାନ ଏକ ଅଘୋଷିତ ‘ପିଞ୍ଜରା’ରେ ପରିଣତ ହୋଇଥିବା ବେଳେ ଏହି ହାଇ-ପ୍ରୋଫାଇଲ୍ ବୈଠକକୁ ନେଇ ଚରମ ଅନିଶ୍ଚିତତା ଦେଖାଦେଇଛି। ସହରର ଖାଲି ରାସ୍ତା, ବନ୍ଦ ବଜାର ଓ ସେନାବାହିନୀର କଡ଼ା ପହରା ମଧ୍ୟରେ ସାଧାରଣ ଜନଜୀବନ ସମ୍ପୂର୍ଣ୍ଣ ସ୍ଥାଣୁ ହୋଇଯାଇଥିବା ବେଳେ ଆମେରିକାର ଉପରାଷ୍ଟ୍ରପତି ଜେ.ଡି. ଭାନ୍ସଙ୍କ ଗସ୍ତ ଶେଷ ମୁହୂର୍ତ୍ତରେ ସ୍ଥଗିତ ରହିବା ଏବଂ ଇରାନୀ ପ୍ରତିନିଧିମଣ୍ଡଳୀଙ୍କ ଆଗମନକୁ ନେଇ କୌଣସି ସ୍ପଷ୍ଟ ସୂଚନା ନ ମିଳିବା ଫଳରେ ସମଗ୍ର ସହରରେ ଏକ ଅସ୍ୱାଭାବିକ ପରିସ୍ଥିତି ସୃଷ୍ଟି ହୋଇଛି। ଲଗାତାର ସୁରକ୍ଷା କଟକଣା ଯୋଗୁଁ ଆର୍ଥିକ ମେରୁଦଣ୍ଡ ଭାଙ୍ଗି ପଡ଼ିଥିବା ବେଳେ ଦୈନିକ ମଜୁରିଆଙ୍କ ଜୀବିକା ବିପନ୍ନ ହୋଇଛି ଏବଂ ଶିକ୍ଷାର୍ଥୀମାନଙ୍କୁ ହଠାତ୍ ହଷ୍ଟେଲ ଖାଲି କରିବାକୁ ନିର୍ଦ୍ଦେଶ ଦିଆଯିବା ଫଳରେ ସାଧାରଣ ନାଗରିକଙ୍କ ମଧ୍ୟରେ ଅସନ୍ତୋଷ ତେଜିବାରେ ଲାଗିଛି।ଇସଲାମାବାଦ ଓ ପଡ଼ୋଶୀ ରାୱଲପିଣ୍ଡି ସହରରେ ଗତ କିଛି ଦିନ ହେବ ଜାରି ରହିଥିବା ଏହି କଡ଼ା ସୁରକ୍ଷା ବଳୟ ଯୋଗୁଁ ବ୍ୟବସାୟିକ ପ୍ରତିଷ୍ଠାନ ଓ ରେଷ୍ଟୁରାଣ୍ଟଗୁଡ଼ିକ ବନ୍ଦ ରହିଛି। ଅଫିସ୍ କର୍ମଚାରୀମାନେ ବାଧ୍ୟ ହୋଇ ଘରୁ କାମ କରୁଥିବା ବେଳେ ସାର୍ବଜନୀନ ପରିବହନ ବନ୍ଦ ହେବା କାରଣରୁ ଟ୍ୟାକ୍ସି ଓ ପରିବହନ କ୍ଷେତ୍ର ସହ ଜଡ଼ିତ ଲୋକଙ୍କ ଆୟ ପ୍ରାୟ ଅଧା ହୋଇଯାଇଛି। କେବଳ ସେତିକି ନୁହେଁ, ଫେବୃଆରୀ ମାସରୁ ଲାଗି ରହିଥିବା ଆମେରିକା-ଇରାନ ଉତ୍ତେଜନା ଫଳରେ ହର୍ମୁଜ୍ ପ୍ରଣାଳୀ ବନ୍ଦ ହେବା କାରଣରୁ ପାକିସ୍ତାନର ଶକ୍ତି ସଙ୍କଟ ଆହୁରି ଘନୀଭୂତ ହୋଇଛି। ସହରର ବିଭିନ୍ନ ଭାଗରେ ଦୈନିକ ୭ ଘଣ୍ଟାରୁ ଅଧିକ ସମୟ ବିଦ୍ୟୁତ୍ କାଟ୍ ହେଉଥିବା ବେଳେ ଏଲପିଜି ଗ୍ୟାସର ଅଭାବ ରନ୍ଧନ କାର୍ୟ୍ୟକୁ ମଧ୍ୟ ପ୍ରଭାବିତ କରିଛି। ସାଧାରଣ ଲୋକଙ୍କୁ ସେମାନଙ୍କ ଗନ୍ତବ୍ୟ ସ୍ଥଳକୁ ଯିବାକୁ ରୋକାଯାଉଥିବାରୁ ଏହା ଏକ ପରିପକ୍ୱ ‘ଲକଡାଉନ୍’ ଭଳି ମନେ ହେଉଛି। ଏହି ସମସ୍ତ ସାମାଜିକ ଓ ଆର୍ଥିକ ବଳିଦାନ ସତ୍ତ୍ୱେ ଆଲୋଚନାର ଭବିଷ୍ୟତ ଏବେ ବି ଅନ୍ଧାରରେ ରହିଛି ଏବଂ ଦେଶରେ ବଢ଼ୁଥିବା ସମସ୍ୟା ଆଗାମୀ ଦିନରେ ଏକ ବଡ଼ ଧରଣର ଗୃହ ବିବାଦର ରୂପ ନେଇପାରେ ବୋଲି ଆଶଙ୍କା କରାଯାଉଛି।