ମହିଳା ଟି-୨୦ରେ ମନ୍ଧାନାଙ୍କ ନୂଆ ରେକର୍ଡ , କଲେ ସର୍ବାଧିକ ରନ୍
ରୁଭାରତୀୟ ମହିଳା କ୍ରିକେଟ୍ ଦଳର ଓପନର୍ ସ୍ମୃତି ମନ୍ଧାନା ମହିଳା ଟି-୨୦ ଅନ୍ତର୍ଜାତୀୟ କ୍ରିକେଟ୍ରେ ସର୍ବାଧିକ ରନ୍ ସ୍କୋର କରିଥିବା ବ୍ୟାଟର୍ ହୋଇଛନ୍ତି । ଏସୀୟ କ୍ରୀଡ଼ାର ସେମିଫାଇନାଲରେ ଶୁକ୍ରବାର ବାଂଲାଦେଶ ବିପକ୍ଷ ମ୍ୟାଚ୍ରେ ବ୍ୟାଟିଂ କରିବା ସମୟରେ ମନ୍ଧାନା ଏହି ଐତିହାସିକ ସଫଳତା ହାସଲ କରିଛନ୍ତି । ଏହି ମ୍ୟାଚ୍ ସହ ମନ୍ଧାନାଙ୍କ ମୋଟ ଟି-୨୦ ଅନ୍ତର୍ଜାତୀୟ ରନ୍ ୬,୭୬୧ରେ ପହଞ୍ଚିଛି। ଏହା ସହ ସେ ନ୍ୟୁଜିଲାଣ୍ଡର ପୂର୍ବତନ ଓପନର୍ ସୁଜି ବେଟ୍ସଙ୍କୁ ପଛରେ ପକାଇଛନ୍ତି । ଚଳିତ ବର୍ଷ ଟି-୨୦ ବିଶ୍ୱକପ୍ ପରେ ଏହି ଫର୍ମାଟ୍ରୁ ଅବସର ନେଇଥିବା ବେଟ୍ସଙ୍କ ନାମରେ ୪,୭୫୮ ରନ୍ ରହିଛି ।
ମନ୍ଧାନା ଏହି ମ୍ୟାଚ୍ରେ ଆଉ ଏକ ବଡ଼ ମାଇଲଖୁଣ୍ଟ ମଧ୍ୟ ଛୁଇଁଛନ୍ତି । ସେ ଟି-୨୦ କ୍ରିକେଟ୍ରେ ୧୦୦ଟି ଛକା ପୂରଣ କରିଛନ୍ତି । ମହିଳା ଟି-୨୦ ଅନ୍ତର୍ଜାତୀୟରେ ସର୍ବାଧିକ ରନ୍ ସଂଗ୍ରହକାରୀଙ୍କ ତାଲିକାରେ ମନ୍ଧାନାଙ୍କ ପଛକୁ ଭାରତୀୟ ଅଧିନାୟିକା ହରମନପ୍ରୀତ୍ କୌର ୪,୨୮୭ ରନ୍ ସହ ତୃତୀୟ ସ୍ଥାନରେ ଅଛନ୍ତି । ଶ୍ରୀଲଙ୍କାର ଅଧିନାୟିକା ଚମାରି ଅଟାପଟୁ ୪,୨୮୨ ରନ୍ ସହ ଚତୁର୍ଥ ଏବଂ ନ୍ୟୁଜିଲାଣ୍ଡର ସୋଫି ଡିଭାଇନ ୩,୮୧୭ ରନ୍ ସହ ପଞ୍ଚମ ସ୍ଥାନରେ ଅଛନ୍ତି ।