ଗ୍ରାହକଙ୍କୁ ମିଳୁନି ଆଶ୍ବସ୍ତି, ପୁଣି ବଢ଼ିଲା ଚିନି ଦର; ୟୁପିରେ ମୂଲ୍ୟ ହ୍ରାସ କରିବାକୁ ମନା କଲେ ମିଲ୍

ନୂଆଦିଲ୍ଲୀ, ୧୧/୯ : ବର୍ଦ୍ଧିତ ଚିନି ଦର ନିୟନ୍ତ୍ରଣ ପାଇଁ ସରକାରୀ ହସ୍ତକ୍ଷେପ ଜାରି ରଖିବା କୌଣସି ଗୁରୁତ୍ୱପୂର୍ଣ୍ଣ ଫଳାଫଳ ଦେଇନାହିଁ ।  କେନ୍ଦ୍ର ସରକାର ଷ୍ଟକ୍ ସୀମା ହ୍ରାସ କରିବା, କ୍ରୁଡ୍‌ ଚିନିର ଶୁଳ୍କମୁକ୍ତ ଆମଦାନୀକୁ ଅନୁମତି ଦେବା ଏବଂ ବିକ୍ରିକୋଟା ବ୍ୟବସ୍ଥା ପରିବର୍ତ୍ତନ କରିବା ଭଳି ପଦକ୍ଷେପ ନେବା ସତ୍ତ୍ୱେ, ଘରୋଇ ବଜାରରେ ଚିନି ଦର ବୃଦ୍ଧି ପାଇବା ଧାରା ଜାରି ରହିଛି। ବୁଧବାର, ମିଲ୍ ସ୍ତରରେ (ଏକ୍ସ-ମିଲ୍) ଏବଂ ପାଇକାରୀ ବଜାରରେ ଚିନି ଦର ଉଚ୍ଚା ରହିଥିଲା, ଯେତେବେଳେ କି ଅନେକ ମିଲ୍ ମୂଲ୍ୟ ଆହୁରି ବୃଦ୍ଧି କରିଛନ୍ତି। ଉତ୍ତର ପ୍ରଦେଶରେ ଚିନି ମିଲ୍‌ଗୁଡିକ ମୂଲ୍ୟ ହ୍ରାସ କରିବାକୁ ସିଧାସଳଖ ମନା କରିଦେଇଛନ୍ତି। ତେବେ ଓଡ଼ିଶାରେ ଚିନି ମୂଲ୍ୟ ୬୦ ଟଙ୍କାରୁ ତଳକୁ ଖସୁନାହିଁ। ଅପରପକ୍ଷେ ଦେଶରେ ଚିନି ଦର ୩୦% କମିଥ଄ବା ସରକାର କହୁଛନ୍ତି।

ସୂତ୍ର ଅନୁଯାୟୀ, ଉତ୍ତର ପ୍ରଦେଶରେ ଅଧିକାଂଶ ଘରୋଇ ଚିନି ମିଲ୍‌ ମୂଲ୍ୟ ହ୍ରାସ କରିବାକୁ ଅନିଚ୍ଛା ପ୍ରକାଶ କରିଛନ୍ତି। ଫଳସ୍ୱରୂପ, ମହାରାଷ୍ଟ୍ର ଏବଂ ଗୁଜରାଟର କିଛି ମିଲ୍ ମଧ୍ୟ ମୂଲ୍ୟ ବୃଦ୍ଧି କରିଛନ୍ତି। ଗତ ଦୁଇ ସପ୍ତାହ ମଧ୍ୟରେ ପ୍ରଥମ ଥର ପାଇଁ ପ୍ରତି କ୍ୱିଣ୍ଟାଲ୍‌ରେ ୫୦୦୦ ଟଙ୍କା ଅତିକ୍ରମ କରିଛନ୍ତି। ସପ୍ତାହ ଆରମ୍ଭରୁ ଚିନି ଦର ୨ ପ୍ରତିଶତରୁ ଅଧିକ ବୃଦ୍ଧି ପାଇଛି। ବୁଧବାର ଏକ୍ସ-ମିଲ୍ ଚିନି ଦର ୪୯୦୦ ଟଙ୍କାରୁ ୫୧୦୦ ଟଙ୍କା ପ୍ରତି କ୍ୱିଣ୍ଟାଲ୍ ମଧ୍ୟରେ ରହିଥିଲା। ଯଦିଓ ସରକାରଙ୍କ ପଦକ୍ଷେପ ପରେ ମହାରାଷ୍ଟ୍ରର ସମବାୟ ମିଲ୍ ପ୍ରାରମ୍ଭରେ ମୂଲ୍ୟ ହ୍ରାସ କରିଥିଲେ, କିନ୍ତୁ ଏବେ ସେମାନେ ମଧ୍ୟ ମୂଲ୍ୟ ବୃଦ୍ଧି କରିବା ଆରମ୍ଭ କରିଛନ୍ତି। ରିପୋର୍ଟ ଅନୁଯାୟୀ, ବ୍ୟବସାୟୀମାନେ ବିଶ୍ୱାସ କରୁଥିଲେ ଯେ ସରକାରୀ ହସ୍ତକ୍ଷେପ ପରେ ମୂଲ୍ୟ ଆହୁରି ହ୍ରାସ ପାଇବ, ତେଣୁ ସେମାନେ ବଡ଼ ପରିମାଣର କ୍ରୟରୁ ନିବୃତ୍ତ ରହିଥିଲେ। ଫଳରେ ଏହା ବଜାରରେ ଏକ ଭିନ୍ନ ପରିସ୍ଥିତି ସୃଷ୍ଟି କରିଛି। ଲଗାତାର ଦୁଇଟି ପର୍ବ ଜନ୍ମାଷ୍ଟମୀ ଏବଂ ଗଣେଶ ପୂର୍ବ ଏବେ ବଜାରରେ ଚିନି ଚାହିଦା ବୃଦ୍ଧି କରିଛି। ବ୍ୟବସାୟୀମାନଙ୍କ ପାଖରେ କମ୍ ଷ୍ଟକ୍ ଏବଂ ବର୍ଦ୍ଧିତ ପାର୍ବଣ ଚାହିଦାର ସୁଯୋଗ ନେଇ ମିଲ୍ ଚଳିତ ସପ୍ତାହରେ ମୂଲ୍ୟ ବୃଦ୍ଧି କରିଥିଲେ। ଏହା ବ୍ୟତୀତ, ଟ୍ରକର ଅଭାବ ଯୋଗାଣକୁ ଯଥେଷ୍ଟ ପ୍ରଭାବିତ କରିଛି। ମହାରାଷ୍ଟ୍ରର ଚିନି ସାଧାରଣତଃ ଉତ୍ତର ପ୍ରଦେଶ ତୁଳନାରେ କ୍ୱିଣ୍ଟାଲ୍ ପିଛା ୨୦୦ ଟଙ୍କା ଶସ୍ତା, କିନ୍ତୁ ଗତ ସପ୍ତାହରେ ଦୁଇ ରାଜ୍ୟ ମଧ୍ୟରେ ମୂଲ୍ୟ ପାର୍ଥକ୍ୟ ୬୦୦ ଟଙ୍କାର ଫରକ୍‌ ଥିଲା। ଉତ୍ତର ପ୍ରଦେଶ ମିଲ୍‌ଗୁଡିକର ଉଚ୍ଚ ମୂଲ୍ୟ ପରେ ମହାରାଷ୍ଟ୍ର ମିଲ୍‌ଗୁଡିକ ମଧ୍ୟ ସେମାନଙ୍କର ଅଫର୍ ମୂଲ୍ୟ ବୃଦ୍ଧି କରିଥିଲେ। ଶିଳ୍ପ ସୂତ୍ର ଅନୁଯାୟୀ, ସେପ୍ଟେମ୍ବର ୮ରେ ମହାରାଷ୍ଟ୍ର ମିଲ୍‌ଗୁଡିକ ସେମାନଙ୍କର ପ୍ରଥମ ସପ୍ତାହର ବିକ୍ରି କୋଟା ପୂରଣ କରିବା ପରେ ପ୍ରତି କ୍ୱିଣ୍ଟାଲ ପିଛା ୭୦୦ ଟଙ୍କା  ମୂଲ୍ୟ ବୃଦ୍ଧି କରିଥିଲେ। ନିକଟରେ ଦେଶର ଅନେକ ସ୍ଥାନରେ ଖୁଚୁରା ବଜାରରେ ଚିନି ଦର କିଲୋ ପିଛା ୭୦ ଟଙ୍କାରୁ ଅଧିକ ହେବା ପରେ କେନ୍ଦ୍ର ଖାଦ୍ୟ ମନ୍ତ୍ରଣାଳୟ ମାସିକ ବିକ୍ରି କୋଟା ବ୍ୟବସ୍ଥାକୁ ପାକ୍ଷିକ ଭାବରେ ପରିବର୍ତ୍ତନ କରିଥିଲା। ନୂତନ ନିୟମ ଅନୁଯାୟୀ, ମିଲ୍‌ଗୁଡ଼ିକୁ ପ୍ରଥମ ସପ୍ତାହରେ ସେମାନଙ୍କର ଆବଣ୍ଟିତ କୋଟାର ୪୦% ଏବଂ ଦ୍ୱିତୀୟ ସପ୍ତାହରେ ଅବଶିଷ୍ଟ ବିକ୍ରି କରିବାକୁ ପଡିବ।