ପୁରୀରେ ଭୋଟ ଗଣତି ପାଇଁ ପ୍ରସ୍ତୁତି ଆରମ୍ଭ

ପୁରୀ ୨୪/୦୨ : ପଞ୍ଚାୟତ ନିର୍ବାଚନ ନେଇ ମତଦାନ ଶେଷ ହେବା ପରେ ଭୋଟ ଗଣତି ପାଇଁ ପ୍ରସ୍ତୁତି ଆରମ୍ଭ ହୋଇଛି । ଚଳିତ ଥର ପ୍ରତି ବ୍ଲକରେ ଭୋଟ ଗଣତି ବ୍ୟବସ୍ଥା ହୋଇଛି। ଆସନ୍ତା ୨୬,୨୭ ଓ ୨୮ ତାରିଖ ତିନି ଦିନ ଧରି ଭୋଟ ଗଣତି କରାଯାଇ ନିର୍ବାଚନ ଫଳାଫଳ ଘୋଷଣା କରାଯିବ।

ତେବେ ପୁରୀ ସଦର ବ୍ଲକରେ ମଧ୍ୟ ୩ଟି ଜିଲ୍ଲା ପରିଷଦ ଜୋନର ଭୋଟ ଗଣତି ପାଇଁ ପୁରୀ ସରକାରୀ ଆଇଟିଆଇ କ୍ୟାମ୍ପସରେ ବ୍ୟବସ୍ଥା ହୋଇଛି। ଭୋଟ ବାକ୍ସ ଗୁଡିକ ଆଇଟିଆଇ କ୍ୟାମ୍ପସର ଷ୍ଟ୍ରଙ୍ଗ ରୁମରେ ରଖାଯାଇଛି। ଏହାର ସୁରକ୍ଷା ପାଇଁ ନିରାପତ୍ତା ବ୍ୟବସ୍ଥା ଗ୍ରହଣ କରାଯାଇଛି। ସିସିଟିଭି କ୍ୟାମେରା ସହ ଦ୍ଵିସ୍ତରୀୟ ପୋଲିସ ସୁରକ୍ଷା ବ୍ୟବସ୍ଥା ରହିଛି। ତେବେ ଚଳିତ ଥର ପଞ୍ଚାୟତ ନିର୍ବାଚନର ଭୋଟ ଗଣତି ଓ ଫଳାଫଳ ଜିଲ୍ଲା ପରିଷଦ ଜୋନ୍ ଅନୁଯାୟୀ ହେବ ବୋଲି କହିଛନ୍ତି ପୁରୀ ସଦର‌ ବିଡିଓ। ଶାନ୍ତି ଶୃଙ୍ଖଳା ସହ ଭୋଟ ଗଣତି କରିବା ପାଇଁ ପ୍ରଶାସନ ପକ୍ଷରୁ ସମସ୍ତ ବ୍ୟବସ୍ଥା ଗ୍ରହଣ କରାଯାଇଛି। ପୁରୀ ଜିଲ୍ଲାର ମୋଟ ୧୧ଟି ବ୍ଲକରେ ୨୬୮ଟି ପଞ୍ଚାୟତ ଓ ୩୩ଟି ଜିଲ୍ଲା ପରିଷଦ ଜୋନ୍ ପାଇଁ ପ୍ରତ୍ୟେକ ବ୍ଲକ ଅଫିସରେ ଭୋଟ ଗଣତି କରାଯାଇ ଫଳାଫଳ ଘୋଷଣା କରାଯିବ।

Spread the love