ସିଙ୍ଗାପୁରର ନୂଆ ରାଷ୍ଟ୍ରପତି ଭାବେ ଶପଥ ନେଲେ ମୂଳ ଭାରତୀୟ ଥର୍ମନ ସନମୁଗରତ୍ନମ
ନୂଆଦିଲ୍ଲୀ: ସିଙ୍ଗାପୁରର ନୂତନ ରାଷ୍ଟ୍ରପତି ଭାବରେ ଆଜି ମୂଳ ଭାରତୀୟ ଥର୍ମନ ସନମୁଗରତ୍ନମ ଶପଥ ନେଇଛନ୍ତି | ସେ ସିଙ୍ଗାପୁରର ୯ମ ରାଷ୍ଟ୍ରପତି ହୋଇଛନ୍ତି। ସୂଚନାଯୋଗ୍ୟ ଯେ ରାଷ୍ଟ୍ରପତି ହଲିମା ୟାକୋବଙ୍କ କାର୍ଯ୍ୟକାଳ ସେପ୍ଟେମ୍ବର ୧୩ରେ ଶେଷ ହୋଇଥିଲା। ଏଭଳି ପରିସ୍ଥିତିରେ ଥର୍ମନ ସନମୁଗରତ୍ନମ ଗୁରୁବାର ରାଷ୍ଟ୍ରପତି ଭାବରେ ଶପଥ ନେଇଛନ୍ତି | ଏହାପୂର୍ବରୁ, ୬୬ ବର୍ଷୀୟ ଥର୍ମନ ସନମୁଗରତ୍ନମ ସିଙ୍ଗାପୁର ରାଷ୍ଟ୍ରପତି ନିର୍ବାଚନରେ ଐତିହାସିକ ବିଜୟ ହାସଲ କରିଥିଲେ । ସେ ଚୀନ୍ର କୋକ ସାଙ୍ଗ ଏବଂ ଟାନ୍ କିନ୍ ଲିଆନଙ୍କୁ ଏକ ବଡ଼ ବ୍ୟବଧାନରେ ପରାସ୍ତ କରିଥିଲେ। କୋକ ୧୫.୨ ପ୍ରତିଶତ ଭୋଟ୍ ଏବଂ ଟାନ୍ ୧୩.୮୮ ପ୍ରତିଶତ ଭୋଟ୍ ପାଇଛନ୍ତି | ଏଥି ସହିତ, ସନମୁଗରତ୍ନମ ୭୦.୪ ପ୍ରତିଶତ ଅର୍ଥାତ୍ ୧୭ ଲକ୍ଷ ୪୬ ହଜାର ୪୨୭ ଭୋଟ୍ ପାଇଥିଲେ ।
ସୂଚନା ଥାଉ କି ସେପ୍ଟେମ୍ବର ୧ରେ ସିଙ୍ଗାପୁରରେ ରାଷ୍ଟ୍ରପତି ନିର୍ବାଚନ ଅନୁଷ୍ଠିତ ହୋଇଥିଲା। ରାଷ୍ଟ୍ରପତି ଭାବେ ଶପଥ ନେବା ପରେ ଥର୍ମନ ସନମୁଗରତ୍ନମ ମଧ୍ୟ ସେହି ଭାରତୀୟଙ୍କ ତାଲିକାରେ ସାମିଲ ହୋଇଛନ୍ତି, ଯେଉଁମାନେ ବିଶ୍ୱ ରାଜନୀତିରେ ପ୍ରାଧାନ୍ୟ ବିସ୍ତାର କରିଛନ୍ତି । ଉଲ୍ଲେଖ ଥାଉ କି ବ୍ରିଟିଶ ପ୍ରଧାନମନ୍ତ୍ରୀ ଋଷି ସୁନକ, ଆମେରିକାର ଉପରାଷ୍ଟ୍ରପତି କମଲା ହାରିସ, ଆମେରିକାର ସାଂସଦ ରାଜ କୃଷ୍ଣମୂର୍ତ୍ତି, ରୋ ଖାନ୍ନା, ପ୍ରମିଲା ଜୟପାଲ, ଶ୍ରୀ ଥାନେଦାରଙ୍କ ଭଳି ଅନେକଙ୍କ ନାମ ରହିଛି। ବର୍ତ୍ତମାନ ଏହି ତାଲିକାରେ ଥର୍ମନଙ୍କ ନାମ ମଧ୍ୟ ଯୋଡା ଯାଇଛି | ତାଙ୍କ ଜେଜେବାପା ଉନବିଂଶ ଶତାବ୍ଦୀରେ ତାମିଲନାଡୁରୁ ସିଙ୍ଗାପୁର ଚାଲିଯାଇଥିଲେ ଓ ସେଠାରେ ଅବସ୍ଥାନ କରିଥିଲେ |