ଅନୁଗୋଳ ଜିଲ୍ଲାରୁ ୬୦ ହଜାର କୋଟି ଟଙ୍କା ରାଜସ୍ୱ ପାଉଥିବା ଓଡ଼ିଶା ସରକାର ଅନୁଗୋଳକୁ ଦେଇଛନ୍ତି କଣ ? : ଅନିଲ ବିଶ୍ୱାଲ

ଭୁବନେଶ୍ୱର, ତା.୨୪/୧୨ : ରାଜ୍ୟ ସରକାର ଧର୍ମକୁ ଆଖିଠାର ଭଳି ଅନୁଗୋଳ ଓ ଢେଙ୍କାନାଳ ଜିଲ୍ଲା ସମେତ ଓଡ଼ିଶାର ବିକାଶକୁ ଅଣଦେଖା କରୁଛନ୍ତି । ଖଣି ସମୃଦ୍ଧ ଅଂଚଳ ଅନୁଗୋଳରୁ ୬୦ ହଜାର କୋଟି ଟଙ୍କା ରାଜସ୍ୱ ଆଦାୟ କରୁଥିଲେ ମଧ୍ୟ ରାଜ୍ୟ ସରକାର ଅନୁଗୋଳକୁ କଣ ଦେଇଛନ୍ତି ବୋଲି ପ୍ରେସ ବିଜ୍ଞପ୍ତି ଜରିଆରେ ପ୍ରଶ୍ନ କରିଛନ୍ତି ରାଜ୍ୟ ବିଜେପି ମୁଖପାତ୍ର ଅନିଲ ବିଶ୍ୱାଲ ।
ନିଜର ଦୋଷ ଦୁର୍ବଳତାକୁ ଲୁଚାଇବା ପାଇଁ କେବଳ କେନ୍ଦ୍ରକୁ ଦୋଷ ଦେବା ବିଜେଡ଼ି ନେତା ତଥା ସରକାରଙ୍କ ଏକ ନିତିଦିନିଆ ଅଭ୍ୟାସରେ ପରିଣତ ହୋଇଗଲାଣି । ନିକଟରେ ମହାମହିମ ରାଜ୍ୟପାଳ ରଘୁବର ଦାସ ଢେଙ୍କାନାଳ ଓ ଅନୁଗୋଳ ଜିଲ୍ଲାର ବିଭିନ୍ନ ସମସ୍ୟା ସମ୍ପର୍କରେ ଉଲ୍ଲେଖ କରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଚିଠି ଲେଖିଥିଲେ । ଯୋରନ୍ଦାରେ ବୃଦ୍ଧାଶ୍ରମ ଚଳାଇଥିବା ମହର୍ଷି ଦୟାନନ୍ଦ ସର୍ଭିସ ମିଶନକୁ ଜମି ହସ୍ତାନ୍ତର ପାଇଁ ସୁପାରିସ ସହ ଗତ ୨ ବର୍ଷ ହେଲା ଆରପିଡିଏସି ବୈଠକ ନ ବସିବା ଫଳରେ ଲୋକଙ୍କ ସମସ୍ୟାର ସମାଧାନ ସହ ଅନ୍ୟାନ୍ୟ ବିଷୟ ସମାଧାନ ପାଇଁ ଚିଠିରେ ଉଲ୍ଲେଖ କରିଥିଲେ । ଏହା ଉପରେ ରାଜ୍ୟ ସରକାର ଉତର କେବେ ରଖିବେ ?
ବିଜେଡି ନେତା ଯେଉଁ କଟକ-ଅନୁଗୋଳ-ସମ୍ବଲପୁର ରାଜପଥ କଥା କହୁଛନ୍ତି, ଆଜି ଯେତିକି ଦ୍ରୁତ ଗତିରେ ଏହି କାମ ତ୍ୱରାନ୍ୱିତ ହେଉଛି, ତାହା କେବଳ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଉଦ୍ୟମ ପାଇଁ । ପୂର୍ବରୁ ୨୭ ଜୁଲାଇ ୨୦୨୩, ୨୮ ସେପ୍େଟମ୍ବର ୨୦୨୨, ୨୬ ଏପ୍ରିଲ ୨୦୨୨, ୮ ଅକ୍ଟୋବର ୨୦୨୧ ସମେତ ପୂର୍ବରୁ କେନ୍ଦ୍ରମନ୍ତ୍ରୀ ନୀତିନ ଗଡକରୀଙ୍କୁ ଭେଟି ଏହି ପ୍ରକଳ୍ପକୁ ତ୍ୱରାନ୍ୱିତ କରିବା ପାଇଁ ଅନେକ ଥର ଚିଠି ଲେଖିଛନ୍ତି । ଭୁବନେଶ୍ୱରରେ କେନ୍ଦ୍ରମନ୍ତ୍ରୀ ଅନେକ ଥର ଏନଏଚଆଇ କର୍ତୃପକ୍ଷଙ୍କୁ ଭେଟି ମଧ୍ୟ ଏହା ଉପରେ ସମୀକ୍ଷା କରିଛନ୍ତି । କେନ୍ଦ୍ର ସରକାରଙ୍କୁ ସହଯୋଗ କରିବା ଜାଗାରେ ରାଜ୍ୟ ସରକାର କାର୍ଯ୍ୟରେ ବାଧା ସୃଷ୍ଟି କରୁଛନ୍ତି ଏବଂ ବିଭିନ୍ନ ପ୍ରକଳ୍ପର କାର୍ଯ୍ୟରେ ବିଳମ୍ବ ହେଉଛି । ଗୋଟିଏ ଗୋଟିଏ ପ୍ରକଳ୍ପରେ ୩-୪ ଡିପିଆର ବଦଳିଯାଉଛି, କାହା ସ୍ୱାର୍ଥରେ ଆଲାଇନମେଂଟ ବଦଳୁଛି, ବିଜୁ ଜନତା ଦଳ ନିଜକୁ ନିଜେ ପଚାରିବା ଆବଶ୍ୟକ ।
ଅନୁଗୋଳ ଜିଲ୍ଲା କଣିହାଁ ବ୍ଲକ ରେଙ୍ଗାଳି ଠାରେ ବ୍ରାହ୍ମଣୀ ନଦୀରେ ୨୦୧୩ରେ ଦ୍ୱିତୀୟ ସେତୁର ନିର୍ମାଣ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶିଳାନ୍ୟାସ କରିଥିଲେ ମଧ୍ୟ ଦୀର୍ଘ ୧୦ ବର୍ଷ ପରେ ମଧ୍ୟ ଏହାର କାମ ସରିନାହିଁ । ଏହା ରାଜ୍ୟ ସରକାରଙ୍କ ବିଫଳତା ତଥା ମନ୍ଥର ବିକାଶର ଗତିର ଏକ ଉଦାହରଣ ଭାବେ ଅନୁଗୋଳ ଓ ରାଜ୍ୟବାସୀଙ୍କ ସାମ୍ନାରେ ରହିଛି । ପ୍ରସ୍ତାବିତ ତାଳଚେର-ଖାଲପାଳ ଦ୍ୱିତୀୟ ବ୍ରାହ୍ମଣୀ ସେତୁ ଘୋଷଣା ହେବା ସତ୍ୱେ ଆଜି ପର୍ଯ୍ୟନ୍ତ କାର୍ଯ୍ୟ ଆରମ୍ଭ ହୋଇପାରିନାହିଁ । ବଡକେରା-ଆଠଗଡ ରାଜ୍ୟ ରାଜପଥ ସମ୍ପୂର୍ଣ୍ଣ ବିପର୍ଯ୍ୟସ୍ତ । କୁମୁରିସିହା-ଫୁଲପଡା ରାସ୍ତା ଖରାପ ଅବସ୍ଥାରେ ଅଛି । ବଲ୍ଲହପୁର ଗ୍ରାମକୁ ରାସ୍ତା ନାହିଁ ।
ରାଜଧାନୀ ଭୁବନେଶ୍ୱରରେ ଟିକେ ବର୍ଷା ହେଲେ ଲୋକଙ୍କ ଘରେ ପାଣି ଜମୁଛି । ଯେଉଁଠି ମୁଖ୍ୟମନ୍ତ୍ରୀ ରହୁଛନ୍ତି, ସରକାରଙ୍କ ଅଧିକାରୀମାନେ ରହୁଛନ୍ତି, ସେମାନଙ୍କ ଘରେ ମଧ୍ୟ ଡ୍ରେନ୍ ପାଣି ପଶୁଛି । ରାଜ୍ୟ ସରକାରଙ୍କ ଅପାରଗତା ଓ ଅବ୍ୟବସ୍ଥା କାରଣରୁ ପ୍ରାକୃତିକ ନାଳ ସବୁ ଜବର ଦଖଲ କରାଯାଇଛି, ଯାହାର ଭୁକ୍ତ ଭୋଗୀ ହୋଇଛନ୍ତି ରାଜଧାନୀବାସୀ । ୨୦୨୧ମସିହା ସେପ୍େଟମ୍ବର ମାସରେ ଭୁବନେଶ୍ୱରରେ ଡ୍ରେନ୍ ପାଣିରେ ଭାସି ଯାଇ ଦଶମ ଶ୍ରେଣୀ ଛାତ୍ର ଜ୍ୟୋତି ପ୍ରକାଶ ବେହେରାଙ୍କ ମୃତ୍ୟୁ ହୋଇଥିଲା । ୨୦୧୫ ମସିହା ଅଗଷ୍ଟ ମାସରେ ଅସଜଡା ଡ୍ରେନ୍ ଭିତରେ ଜଣେ ୯ ବର୍ଷର ବାଳକ ପୁପୁନ ବିଶ୍ୱାଳ ଭାସି ଯାଇଥିଲେ । ୨୦୧୭ରେ ଜଣେ ଟ୍ୟୁସନ୍ ସାର, ୨୦୧୮ରେ ଗୋଟିଏ ଛୋଟ ପିଲା ଏବଂ ୨୦୧୯ରେ ଜଣେ ବୃଦ୍ଧା ମୁକୁଳା ଡ୍ରେନ୍‌ରେ ଭାସି ଯାଇଥିଲେ । ଏତେ ସବୁ ଘଟଣା ଘଟିବା ପରେ ମଧ୍ୟ ଆଜି ବି ସେହି ସମାନ ଅବସ୍ଥା ।
ଦୁଇଟି ମହାନଗମ ନିଗମ ତଥା ଗୋଟିଏ ପଟେ ରାଉରକେଲାରେ ଲୋକମାନେ ହଇଜାରେ ଆକ୍ରାନ୍ତ ହୋଇ ଅନେକ ମୃତ୍ୟୁବରଣ କରିଥିବା ବେଳେ ଶତାଧିକ ଲୋକ ଉତ୍ତମ ଚିକିତ୍ସା ଓ ସ୍ୱାସ୍ଥ୍ୟସେବା ପାଇବା ପାଇଁ ଅପେକ୍ଷା କରିଛନ୍ତି । ଅପରପକ୍ଷରେ ଭୁବନେଶ୍ୱରରେ ଅଳିଆ ଗଦାର ଯେଉଁ ପାହାଡ କରାଯାଇ କୃତିମ ପ୍ରଦୂଷଣ ସୃଷ୍ଟି କରାଯାଇଛି, ତାର ସମାଧାନ ପାଇଁ ରାଜ୍ୟ ସରକାର କଣ କରିଛନ୍ତି ? ଲୋକମାନେ ଅଳିଆର ଗନ୍ଧରେ ଅଣନିଶ୍ୱାସୀ ହୋଇପଡି ବାରମ୍ବାର ଅନୁରୋଧ ଦାବି ପରେ ସରକାରଙ୍କ ପଦକ୍ଷେପ କଣ ବୋଲି ଶ୍ରୀ ବିଶ୍ୱାଲ ପ୍ରଶ୍ନ କରିଛନ୍ତି