ବଦଳିଲା ପିପିଏଫ, ସୁକନ୍ୟା ସମୃଦ୍ଧି ଯୋଜନାର ନିୟମ: ୧ ଅକ୍ଟୋବର ପୂର୍ବରୁ ସାରନ୍ତୁ ଏହି କାମ, ନଚେତ୍ ଆକାଉଣ୍ଟ ହୋଇପାରେ ବନ୍ଦ

ଯଦି ଆପଣ ପିପିଏଫ୍, ସୁକନ୍ୟା ସମୃଦ୍ଧି ଯୋଜନାରେ ନିବେଶ କରିଛନ୍ତି, ତେବେ ଆପଣଙ୍କ ପାଇଁ ଏକ ଗୁରୁତ୍ୱପୂର୍ଣ୍ଣ ଖବର ଅଛି । ଏହି ଯୋଜନାଗୁଡିକ ସହିତ ଜଡିତ ନିୟମକୁ ସରକାର ପରିବର୍ତ୍ତନ କରିଛନ୍ତି । ଯଦି ଆପଣ ଏହି ନିବେଶ ଯୋଜନାରେ ନିବେଶ କରିଛନ୍ତି, ତେବେ ଆପଣଙ୍କୁ ଅକ୍ଟୋବର ୧ ପୂର୍ବରୁ କିଛି ଗୁରୁତ୍ୱପୂର୍ଣ୍ଣ କାର୍ଯ୍ୟ ଶେଷ କରିବାକୁ ପଡିବ, ନଚେତ୍ ଆପଣଙ୍କ ଆକାଉଣ୍ଟ ନିଷ୍କ୍ରିୟ ହୋଇପାରେ ।

ପିପିଏଫ୍: – ଗତ ମାସରେ ଅର୍ଥ ମନ୍ତ୍ରଣାଳୟର ଅର୍ଥନୈତିକ ବ୍ୟାପାର ବିଭାଗ ଦ୍ୱାରା ପବ୍ଲିକ ପ୍ରୋଭିଡେଣ୍ଟ ପାଣ୍ଠି (ପିପିଏଫ) ନିୟମିତକରଣ ସମ୍ପର୍କରେ ନିର୍ଦ୍ଦେଶାବଳୀ ଜାରି କରାଯାଇଥିଲା । ଏହି ନିର୍ଦ୍ଦେଶାବଳୀ ୧ ଅକ୍ଟୋବର ୨୦୨୪ ରୁ କାର୍ଯ୍ୟକାରୀ ହେବାକୁ ଯାଉଛି । ଆସନ୍ତା ମାସ ଆରମ୍ଭରୁ, ୧୮ ବର୍ଷ ବୟସ ନହେବା ପର୍ଯ୍ୟନ୍ତ ନାବାଳକଙ୍କ ନାମରେ ଖୋଲାଯାଇଥିବା ପିପିଏଫ୍ ଆକାଉଣ୍ଟରେ ସେଭିଂ ଆକାଉଣ୍ଟ ସୁଧ ଉପଲବ୍ଧ ହେବ । ଏହା ସହ ଯଦି ଆପଣଙ୍କର ଏକରୁ ଅଧିକ ପିପିଏଫ୍ ଆକାଉଣ୍ଟ୍ ଅଛି, ତେବେ ସ୍କିମ୍ ହାର ଅନୁଯାୟୀ କେବଳ ଗୋଟିଏ ଆକାଉଣ୍ଟ ସୁଧ ପାଇବ । ବାକି ଅନ୍ୟ ପିପିଏଫ ଆକାଉଣ୍ଟରେ ଜମା ହୋଇଥିବା ରାଶି ଉପରେ କୌଣସି ପ୍ରକାରର ସୁଧ ଦିଆଯିବ ନାହିଁ ।

ସୁକନ୍ୟା ସମୃଦ୍ଧି ଯୋଜନା: ଝିଅମାନଙ୍କ ପାଇଁ ଆରମ୍ଭ ହୋଇଥିବା ସୁକନ୍ୟା ସମୃଦ୍ଧି ଯୋଜନା ପାଇଁ ମଧ୍ୟ ନୂଆ ନିୟମ ଲାଗୁ ହୋଇଯିବ । ଅକ୍ଟୋବର ୧ ରୁ ଏହା ସହ ଜଡିତ ନିୟମରେ ପରିବର୍ତ୍ତନ ଆସିବ । ନୂତନ ନିୟମ ଅନୁଯାୟୀ, ଯେଉଁ ଆକାଉଣ୍ଟକୁ ଜେଜେବାପା କିମ୍ବା ଅନ୍ୟ କେହି ଖୋଲିଛନ୍ତି, ତାହାକୁ ଆଇନଗତ ଭାବେ ଅଭିଭାବକ କିମ୍ବା ପିତାମାତାଙ୍କ ନାମରେ ସ୍ଥାନାନ୍ତର କରିବାକୁ ପଡିବ । ଆକାଉଣ୍ଟଗୁଡ଼ିକର ସ୍ୱଚ୍ଛତା ଏବଂ ସଠିକ୍ ରକ୍ଷଣାବେକ୍ଷଣ ବଜାୟ ରଖିବା ହେଉଛି ସରକାରଙ୍କ ଉଦ୍ଦେଶ୍ୟ ।