ଠପ୍ ପଡ଼ିଗଲା ଏକ୍ସ : ଲୋଡ୍ ହେଲା ନାହିଁ ପୋଷ୍ଟ, ୧୮,୬୦୦ ରୁ ଅଧିକ ଅଭିଯୋଗ

ଭୁବନେଶ୍ୱର : ଠପ୍ ପଡ଼ିଗଲା ଏକ୍ସ ।  ଅନେକ ଉପଭୋକ୍ତାଙ୍କ ପାଇଁ ଧିମେଇ ଗଲା ସୋସିଆଲ ମିଡିଆ ପ୍ଲାଟଫର୍ମ ।  ଲୋଡ୍ ହେଲା ନାହିଁ ପୋଷ୍ଟ। ଅନେକ ଉପଭୋକ୍ତଙ୍କ ପାଇଁ ବ୍ୟାପକ ସମସ୍ୟା ଦେଖାଦେଲା। ହଜାର ହଜାର ଉପଭୋକ୍ତାଙ୍କ ପାଇଁ ସାଇଟ୍ ଆକ୍ସେସ୍ କରିବାରେ ବାଧା ସୃଷ୍ଟି ହେଲା ।  ୧୮,୬୦୦ ରୁ ଅଧିକ ଅଭିଯୋଗ ଆସି ପହଞ୍ଚିଲା ।

ଯେଉଁଥିରେ ମୁଖ୍ୟତଃ ପୋଷ୍ଟଗୁଡ଼ିକ ଲୋଡ୍ ନହେବା, ଟାଇମ୍ ଲାଇନ୍ ଦେଖା ନଯିବା ଭଳି ଅଭିଯୋଗ ହେଲା ।  ଏହାସହ ଆସିଲା Something went wrong, ପୁନଃ ଲୋଡ୍ କରିବାକୁ ଚେଷ୍ଟା କରନ୍ତୁ ଭଳି ବାର୍ତ୍ତା ।   ଆମେରିକା, ଭାରତ, ବ୍ରିଟେନ୍ ଏବଂ ଅନ୍ୟାନ୍ୟ ଦେଶର ଉପଭୋକ୍ତାମାନେ ପ୍ଲାଟଫର୍ମରେ ହିଁ ନିଜର ଅସନ୍ତୋଷ ପ୍ରକାଶ କଲେ ।

ଏହି ସମସ୍ୟାର ମୂଳ କାରଣ X ର କଣ୍ଟେଣ୍ଟ୍ ଡେଲିଭରୀ ନେଟୱାର୍କ Cloudflare ସହ ଜଡିତ ଏକ ତୃତୀୟ ପକ୍ଷ ସମସ୍ୟା ବୋଲି ଜଣାପଡିଛି ।  ଏହା ଫଳରେ ଯୋଗାଯୋଗରେ ବ୍ୟାଘାତ ସହ ଲୋଡିଂ ଧିମେଇ ଯାଇଛି ।  ମାର୍ଚ୍ଚରେ ଘଟିଥିବା ଘଟଣା ପରି କୌଣସି ସାଇବର୍ ଆକ୍ରମଣର ଉଲ୍ଲେଖ କରାଯାଇ ନାହିଁ । ଅପରାହ୍ନ ବେଳକୁ, ଅଧିକାଂଶ ଉପଭୋକ୍ତାଙ୍କ ପାଇଁ ସମସ୍ୟା କମିଯାଇଥିଲା ।

ସମସ୍ୟା ରିପୋର୍ଟ ସଂଖ୍ୟା ୬୦୦ ତଳକୁ ଖସି ଆସିଥିଲା। X ପକ୍ଷରୁ କୌଣସି ଆନୁଷ୍ଠାନିକ ବୟାନ ଜାରି କରାଯାଇ ନାହିଁ। କିନ୍ତୁ ଉପଭୋକ୍ତାମାନେ ଜଣାଇଛନ୍ତି ଯେ କିଛି ମିନିଟ୍ ରୁ କିଛି ଘଣ୍ଟା ମଧ୍ୟରେ ସାମାନ୍ୟ ଅଚଳାବସ୍ଥା ପରେ ଆଂଶିକ ସୁଧାର ଆସିଛି। ଏହା ୨୦୨୫ ମସିହାରେ ଏକ୍ସର ଚତୁର୍ଥ ବଡ଼ ତ୍ରୁଟି।