ବନ୍ୟା ଯୋଗୁ ଦିନରେ ହୀନସ୍ତା, ରାତିରେ ସରୀସୃପଙ୍କ ଡର

ଆଳି: ବନ୍ୟା ଯୋଗୁ ଦିନରେ ହୀନସ୍ତା । ରାତିରେ ସରୀସୃପଙ୍କ ଡର । କେନ୍ଦ୍ରାପଡା ଜିଲ୍ଲା ଆଳି ବ୍ଲକର ମାଣିକପାଟଣା ଗାଁରେ ଏବେବି ପାଣି ଜମି ରହିଛି । ଗାଁ ଦାଣ୍ଡରେ ପାଣି ଲହଡି ମାରୁଥିବାବେଳେ ଘର ଭିତରେ ପଶିଛି ପାଣି । ରାତି ହେଲେ ସରୀସୃପଙ୍କ ଭୟ ଘାରୁଛି । ସାରା ରାତି ଉଜାଗର ରହି ଲାଇଟ୍ ଧରି ବୁଲୁଛନ୍ତି ଲୋକ । ବନ୍ୟା ପାଇଁ ଆତଙ୍କିତ ଅବସ୍ଥାରେ ଗାଁର ୭୦୦ ପରିବାର ।

କେନ୍ଦ୍ରାପଡ଼ା ଜିଲ୍ଲା ଆଳି ବ୍ଲକ୍ର ମାଣିକପାଟଣା ଗାଁରେ ବନ୍ୟା ପାଣି ଏବେ ବି ଲୋକଙ୍କ ଜୀବନକୁ ଦୁର୍ବିସହ କରି ରଖିଛି । ଗାଁର ବିଭିନ୍ନ ସ୍ଥାନରେ ପାଣି ଜମି ରହିଥିବା ବେଳେ ଗାଁ ଦାଣ୍ଡରେ ପାଣି ଲହଡ଼ି ମାରୁଛି । କେବଳ ରାସ୍ତାଘାଟ ନୁହେଁ, ବହୁ ଲୋକଙ୍କ ଘର ଭିତରକୁ ମଧ୍ୟ ବନ୍ୟା ପାଣି ପଶିଯାଇଛି । ଫଳରେ ଦିନରେ ଜୀବନ ଯେତିକି କଷ୍ଟକର ହେଉଛି, ରାତି ହେଲେ ସେତିକି ବଢ଼ିଯାଉଛି ସରୀସୃପଙ୍କ ଭୟ ।

ବନ୍ୟା ପାଣି ସହିତ ସାପ ଓ ଅନ୍ୟାନ୍ୟ ସରୀସୃପ ଘର ଓ ଆଖପାଖ ଅଞ୍ଚଳକୁ ପଶିଆସିବା ଆଶଙ୍କା ରହୁଛି । ତେଣୁ ରାତିରେ ଲୋକେ ଆଖିରେ ନିଦ ଦେଉନାହାନ୍ତି । ହାତରେ ଟର୍ଚ୍ଚ ଓ ଲାଇଟ୍ ଧରି ସାରା ରାତି ଜଗି ରହୁଛନ୍ତି । ପରିବାରର ଛୋଟ ପିଲା, ବୃଦ୍ଧ ଓ ମହିଳାଙ୍କୁ ନେଇ ଲୋକଙ୍କ ଚିନ୍ତା ଆହୁରି ବଢ଼ିଛି ।